आजः २०७७ मंसिर १४, आईतवार

दम्पतीमाथि धारिलो हतियारले आक्रमण


रौतहट: मौलापुर नगरपालिका वडा नम्बर ५ पतौरा गाउँका ३५ वर्षीय हरेन्द्र शाह र उनकी श्रीमती शिला देवीमाथि धारिलो हतियारले साङ्घातिक आक्रमण भएको छ।

धारिलो हतियारको आक्रमणले हरेन्द्रको दाहिने कानका छेउमा र पत्नीको दाहिने पाखुरामा गम्भीर घाउ लागेको छ। उनीहरुलाई गम्भीरावस्थामा तत्कालै उपचारका लागि गएराति एम्बुलेन्सबाट एलएस न्युरो अस्पताल वीरगञ्ज पठाइएको छ। रातभरिको उपचारपछि दुवैको अवस्था सुधार हुँदै गएको जिल्ला प्रहरी प्रवक्ता भरत श्रेष्ठले जानकारी दिए।

राति १ बजे साह दम्पती सुतिरहेका अवस्थामा अज्ञात मानिसले दुवैमाथि धारिलो हतियारले आक्रमण गरेको थियो। आक्रमणको ठोस कारण खुल्न नसके पनि घटनास्थलको प्रकृतिअनुसार शाहका घरमा चोरी गर्ने उद्देश्यले चोर आएको र जाग्राम भएपछि आफू बच्नलाई दम्पतीमाथि आक्रमण गरेर भागेको हुनसक्ने प्रहरीको प्रारम्भिक अनुमान छ।

जिल्ला प्रहरी प्रवक्ता श्रेष्ठले घरमा चोर देखेर शिलादेवीले होहल्ला गर्दा उनीमाथि पहिले र हरेन्द्र उठ्दा उनीमाथि पछि आक्रमण भएको बताउँदै घटनामा संलग्नको खोजी तथा अनुसन्धान भइरहेको जानकारी दिए।